ഡോ. രാജൻ പെരുന്ന
ശാന്തമാകുന്നില്ലേ മനസ്?
ഒരു നിമിഷമെങ്കിലും
നിങ്ങളുടെ മനസ് ശാന്തമായിരിക്കുന്നുണ്ടോ? നൂറായിരം
ചിന്തകൾ കടലിലെ ഒടുങ്ങാത്ത തിരമാലകളെപ്പോലെ മനസ്സിൽ മനസ്സിൽ വന്നും പോയുമിരിക്കുകയല്ലേ?
വേണ്ടെന്നു വിചാരിച്ചിട്ടും പിന്നെയും മുന്നിലേക്ക് അവ ഓടിയെത്തിക്കൊണ്ടിരിക്കുന്നു,
അല്ലേ?
ഇപ്പോൾ
നിങ്ങൾ ചിന്തിക്കുന്നുണ്ടാവും. കുരങ്ങനെപ്പോലെ
ചാടിക്കൊണ്ടിരിക്കുന്ന മനസിനെ പിടിച്ച് നിർത്താൻ വല്ല മാർഗ്ഗവുമുണ്ടോ? തീർച്ചയായും മാർഗമുണ്ട്. അൽപനേരം കണ്ണടച്ച് ഇരുന്നുനോക്കൂ. എന്നിട്ട് കണ്ണുകളുടെ
മധ്യഭാഗത്ത് ഒരു ബിന്ദുവുണ്ടെന്നു സങ്കല്പിച്ച് അതിലേക്ക് സൂക്ഷിച്ചു നോക്കൂ. ആ ബിന്ദുവിന് ചുറ്റും ഒട്ടനവധി രൂപമില്ലാത്ത ചിത്രശകലങ്ങൾ.
പ്രകാശത്തിന്റെ നനുത്ത ശൽക്കങ്ങൾ. ഇളകി മറിയുന്ന എന്തൊക്കെയോ അവ്യക്തരൂപങ്ങൾ. കാലിഡോസ്‌കോപ്പിലെന്ന
പോലെ അസംഖ്യം വർണാഭമായ ചിത്രമാതൃകകൾ ഒക്കെ നിങ്ങൾക്ക് കാണാൻ കഴിയുന്നില്ലേ? ആലോചിച്ചു നോക്കൂ, നിങ്ങളുടെ മനസാണോ നിങ്ങൾ കാണുന്നത്? അല്ലെങ്കിൽ
പിന്നെ അവയെന്താണ്?
ദൈനംദിന ജീവിതമെന്ന പാരാവാരത്തിൽ മുങ്ങുമ്പോൾ കിട്ടുന്ന കാക്കകളും ചിപ്പികളും കാണാപ്പൊന്നുകളുമാണ് മനസ് നിറയെ. കണ്ടും കെട്ടും നേരിട്ടനുഭവിച്ചും നിമിഷത്തിന്റെ ഓരോ കണികയിലും ഇത്തരം സാധനങ്ങൾ നാം പെറുക്കിക്കൂട്ടി മനസ്സിൽ അടുക്കിക്കൊണ്ടിരിക്കുകയാണ്. മൂല്യവിചാരത്തിനൊന്നും ഒരുങ്ങാതെ എല്ലാം മനസിലേക്ക്. ഓർമകളും പ്രതീക്ഷകളും.... അങ്ങനെ പലതും ഒളിഞ്ഞിരിപ്പുണ്ടെന്നുമറിയാം.
ഇതിനെയെല്ലാം നിയന്ത്രിക്കാനുള്ള ഏറ്റവും നല്ല മാർഗം മനസ് ഒരു ബിന്ദുവിലേക്ക് കേന്ദ്രീകരിക്കുകയാണ്.
