മലമായോപ - വിശ്വസിക്കാവുന്ന മന്ത്രം
ഏതു മന്ത്രവും ഫലം നല്‍കണമെങ്കില്‍, അതിന്‍റെ ശക്തിയില്‍ പൂര്‍ണമായി വിശ്വസിക്കണമെന്നു പറയാറുണ്ട്. മനസ്സിലെ വിദ്ധ്യാത്മകമായ പ്രതീക്ഷയാണ് മന്ത്രങ്ങളെല്ലാം. വിശ്വാസമാണ് അതിന്‍റെ ശക്തി. മന്ത്രം നിശ്ചിതമായ മാത്രയില്‍ ആവര്‍ത്തിക്കുമ്പോള്‍ ആ പ്രതീക്ഷ മനസ്സിലേക്ക് കൂടുതല്‍ ശക്തിയില്‍ പതിപ്പിക്കുകയാണ് നാം. അങ്ങനെ മെല്ലെ മെല്ലെ പ്രതീക്ഷയുടെ വിദ്ധ്യാത്മകമായ ഊര്‍ജം മനസ്സിലും ശരീരത്തിലും നിറയുന്നു. അത് നമ്മെ നിരന്തരമായി കര്‍മോത്സുകരാക്കുന്നു. നിരന്തരം പരിശ്രമിക്കുന്നതിനാല്‍ മന്ത്രം ഫലപ്രാപ്തിയിലെത്തുന്നു. അങ്ങനെ ഫലപ്രാപ്തി നല്‍കുന്ന വിജയമന്ത്രമാണ് മലമായോപ.
മലമായോപ എന്ന മന്ത്രം വിജയത്തിലേക്കുള്ള നിങ്ങളുടെ യത്നത്തിന് ശക്തി പകരുന്നതെങ്ങനെയാണെന്നു നോക്കാം. ആദ്യം ഈ പഞ്ചാക്ഷരമന്ത്രത്തിലെ ഓരോ അക്ഷരത്തിന്‍റെയും പൊരുള്‍ തിരിച്ചറിയണം നിങ്ങള്‍. മനോഭാവം, ലക്ഷ്യം, മാര്‍ഗം, യോഗ്യത, പരിശ്രമം എന്നീ അഞ്ചു വാക്കുകളിലെ ആദ്യാക്ഷരങ്ങള്‍ ചേര്‍ന്നാണ് മലമായോപ എന്ന അതിശക്തമായ ഈ മന്ത്രം ഉണ്ടാക്കിയിരിക്കുന്നത്. ഈ അഞ്ചു വാക്കുകളും വിജയത്തിനായി കൊതിക്കുന്ന ഒരാളിന്‍റെ ജീവിതവുമായി ബന്ധപ്പെട്ടവയാണ്. ഇവയെ ആസ്പദമാക്കി ക്ലിപ്തവും ആസൂത്രിതവുമായ പ്രവര്‍ത്തനപദ്ധതികള്‍ ഉണ്ടായാല്‍ ജീവിതത്തില്‍ വിജയം സുനിശ്ചിതമാണ്. .
ഇങ്ങനെയൊന്നുമല്ലാതെ ജീവിച്ചവരില്‍ ചിലര്‍ക്കും വിജയിക്കാന്‍ കഴിഞ്ഞിട്ടില്ലേ? ഉണ്ടാകാം. ഭാഗ്യം എന്ന ഒറ്റ വാക്കു കൊണ്ട് അവരുടെ വിജയത്തെ നാം ന്യായീകരിക്കുവാന്‍ നാം ശ്രമിക്കും. എന്നാല്‍ ഭാഗ്യം എന്ന ഒരവസ്ഥയുണ്ടോ? ഭാഗ്യമെന്നത് പരിശ്രമത്തിന്‍റെ മറ്റൊരു വാക്കാണ്. ഏതു പരിശ്രമത്തിനും ഫലം ലഭിക്കുവാന്‍ സഹജമായൊരു കാലദൈര്‍ഘ്യമുണ്ട്. പരിശ്രമവും ഫലവും ഒരേ സമയത്ത് സംഭവിക്കുമ്പോള്‍ അതിനെ നാം ഭാഗ്യമെന്നു വിളിക്കുന്നു. അത് കേവലമൊരു യാദൃച്ഛികത മാത്രം. ഏതെങ്കിലുമൊരു നിയമത്തിന് വഴങ്ങുന്നില്ല.
No comments:
Post a Comment