അധിനിവേശത്തിന്റെ വ്യാകരണം
ടെലിവിഷന് കാണല് നമ്മുടെ ശീലമായി മാറുന്നതോടെ ബോധപൂര്വമായ അറിവുകൂടാതെ തന്നെ ടെലിവിഷനില് നിന്നു ലഭിക്കുന്ന സംജ്ഞകളും സൂചനകളും നമ്മുടെ അവബോധത്തെ ശക്തമായി സ്വാധീനിക്കും. ടെലിവിഷനില് കാണുന്നതൊക്കെ ശരിയാണെന്ന തോന്നല് ശക്തമാകുന്നതോടെ ഇത് അധിനിവേശമായി മാറുന്നു. മാനസികമായി നമുക്ക് എതിര്ക്കാന് കഴിയാത്ത അവസ്ഥയിലേക്ക് നമ്മുടെ അവബോധം മാറുന്നു.
വേഷവും ഭക്ഷണവും മുതല് സംസ്കാരത്തിന്റെ ചിഹ്നങ്ങളായ ഭാഷയും സാഹിത്യവും കലാരൂപങ്ങളുമൊക്കെ പരിവര്ത്തിതമാകുന്നത് ടെലിവിഷന് വികിരണം ചെയ്യുന്ന സാംസ്കാരികോര്ജം കൊണ്ടു കൂടിയാണ്. പ്രായേണ അവഗണിക്കപ്പെട്ട വടക്ക് കിഴക്കന് പ്രദേശങ്ങളെ ഭാരതത്തിന്റെ മുഖ്യഭൂമിയിലേക്ക് സങ്കോചമെന്യേ സ്വീകരിക്കാന് സോണി ടെലിവിഷന് സംപ്രേഷണം ചെയ്ത ഇന്ഡ്യന് ഐഡല് (കിറശമി കറീഹ) എന്ന ടെലിവിഷന് ഷോയ്ക്ക് കഴിഞ്ഞ കാര്യം നളിന് മേത്ത എഡിറ്റ് ചെയ്ത ടെലിവിഷന് ഇന് ഇന്ഡ്യ എന്ന ഗ്രന്ഥത്തിന്റെ ആമുഖപ്രബന്ധത്തില് വിവരിക്കുന്നുണ്ട്. പ്രസ്തുത റിയാലിറ്റി ഷോയുടെ മൂന്നാമത്തെ വര്ഷം ഡാര്ജിലിംഗില് നിന്നുള്ള ഗൂര്ഖയായ പ്രശാന്ത് തമംഗും മേഘാലയയില് നിന്നുള്ള അമിത് പോളും ഫൈനലിലെത്തിയത് ചെറിയ കാര്യമല്ല.
ഇതൊക്കെ പുതിയ ടെലിവിഷന് സാംസ്കാരത്തിന്റെ അടയാളപ്പെടുത്തലുകളാണ്. ടെലിവിഷനിലെ പരമ്പരകളുടേതു മാത്രമായി പരിമിതപ്പെടുത്തേണ്ട രേഖകളല്ല ഇത്. നമുക്കറിയാം, എല്ലാക്കാലത്തും സിനിമയ്ക്കും സിനിമയോടു ബന്ധപ്പെട്ട പ്രോഗ്രാമുകള്ക്കും - പുതിയ ചിത്രങ്ങളുടെ ടീസറുകള്, ട്രെയ്ലറുകള്, പ്രൊമോഷനുകള്, ചലച്ചിത്ര പ്രവര്ത്തകരുമായുള്ള അഭിമുഖങ്ങള്, വാര്ത്തകള്, അവാര്ഡ് നിശകള് മുതലായവ - പ്രേക്ഷ്രകരുടെ മനസില് പ്രത്യേക സ്ഥാനമുണ്ട്.
Comments
Post a Comment